Dangos sut mae digwyddiadau yn cyfrannu at lesiant yr Alban

Gweithiodd Wavehill gyda VisitScotland, ar ran Grŵp Cynghori’r Diwydiant Digwyddiadau a phartneriaid Llywodraeth yr Alban, i archwilio sut mae digwyddiadau’n cyfrannu at lesiant yr Alban.

Ein hymagwedd

Cyfunwyd adolygiad systematig o dystiolaeth genedlaethol a rhyngwladol ag ymgynghoriadau â rhanddeiliaid yn cynnwys trefnwyr digwyddiadau, llunwyr polisi ac ymchwilwyr. Cynhaliwyd gweithdy sector hefyd i brofi canfyddiadau cynnar a datblygu fframwaith ymarferol i helpu trefnwyr digwyddiadau i fesur eu cyfraniad at ganlyniadau llesiant. Ynghyd ag adolygu mwy na 100 o ffynonellau, creodd y gwaith ganllawiau y gellid eu defnyddio ar draws digwyddiadau o wahanol feintiau a mathau.

Effaith

Canfu’r astudiaeth y gall digwyddiadau mawr gyfrannu at enw da rhyngwladol yr Alban a balchder cenedlaethol. Ers 2003, roedd EventScotland wedi cefnogi mwy na 1,000 o ddigwyddiadau, gan fuddsoddi dros £47 miliwn a chynhyrchu £1.3 biliwn o effaith economaidd net.
Canfu’r ymchwil dystiolaeth gyson fod digwyddiadau’n helpu i gryfhau cydlyniant cymunedol, balchder dinesig a chysylltiad pobl â lle, yn enwedig pan fo cymunedau’n cael eu cynnwys yn weithredol wrth lunio a chyflwyno gweithgareddau.
Tynnodd y dystiolaeth sylw at y rôl bwysig y mae digwyddiadau’n ei chwarae wrth adeiladu cyfalaf cymdeithasol, gan greu cyfleoedd i bobl gwrdd, gwirfoddoli a datblygu cysylltiadau cymdeithasol newydd sy’n cyfrannu at lesiant.
Roedd cymryd rhan yn rheolaidd mewn digwyddiadau diwylliannol a chwaraeon yn gysylltiedig â lefelau uwch o lesiant, gyda digwyddiadau’n helpu i fynd i’r afael ag unigrwydd, lleihau arwahanrwydd a chefnogi iechyd meddwl cadarnhaol.

Datblygodd y prosiect fframwaith mesur ymarferol i helpu trefnwyr digwyddiadau i gofnodi canlyniadau llesiant ochr yn ochr ag effeithiau economaidd, gan gefnogi dealltwriaeth fwy cyfannol o werth, a helpu i lywio buddsoddiad, polisi a dylunio digwyddiadau yn y dyfodol ar draws yr Alban.

Mae’r adroddiad ar gael i’w ddarllen yma.