Mewnwelediad cynnar i effaith i lunio naratif cyfathrebu ar gyfer fferm wynt alltraeth Awel y Môr

Comisiynwyd Wavehill gan RWE i gynnal astudiaeth economaidd-gymdeithasol o’r fferm wynt arfaethedig alltraeth Awel y Môr. Cynhaliwyd y gwaith cyn ymarferion ymgynghori er mwyn helpu i lunio negeseuon cyhoeddus. Roedd hefyd yn cefnogi prosesau gwneud penderfyniadau mewnol drwy brofi sut yr oedd gwahanol senarios datblygu, yn enwedig lleoliadau porthladdoedd, yn dylanwadu ar y canlyniadau posibl.

Cyfunodd yr astudiaeth fodelu a mewnwelediadau gan randdeiliaid i adeiladu sylfaen dystiolaeth y gellid ei defnyddio’n gyson drwy gydol y gweithgarwch ymgysylltu. Roedd hyn yn cynnwys:

• Dadansoddiad o’r gadwyn gyflenwi yn seiliedig ar ddatblygiadau ffermydd gwynt alltraeth tebyg.
• Modelu senarios ar draws gwahanol feintiau a lleoliadau prosiectau.
• Cyfweliadau â rhanddeiliaid i gasglu safbwyntiau lleol a safbwyntiau’r diwydiant.
• Asesiad o wariant, Gwerth Ychwanegol Crynswth (GYC) a blynyddoedd gwaith ar draws gwahanol gamau’r prosiect.

Roedd y dull hwn yn galluogi cyflwyno esboniad clir o sut y gallai buddsoddiad drosi’n weithgarwch economaidd.

Dangosodd y dadansoddiad fod yr effeithiau’n amrywio dros amser ac ar draws gwahanol ardaloedd daearyddol, tra nodwyd mai’r dewis o borthladd oedd un o’r prif ffactorau a oedd yn dylanwadu ar sut yr oedd y buddion hyn yn cael eu dosbarthu. Roedd gwahanol senarios yn symud gweithgarwch rhwng Gogledd Cymru, Gogledd-orllewin Lloegr a Gogledd Iwerddon, gan ddarparu sail strwythuredig ar gyfer cymharu’r opsiynau.

Defnyddiwyd allbynnau’r astudiaeth i gefnogi ymgysylltu allanol drwy gyflwyno naratif clir, wedi’i feintioli, o’r buddion posibl. Helpodd hyn RWE i leoli’r prosiect yng nghyd-destun blaenoriaethau economaidd lleol a rhanbarthol, dangos sut y gallai cyfranogiad yn y gadwyn gyflenwi ddylanwadu ar y canlyniadau, a rhoi dealltwriaeth gyffredin i randdeiliaid o’r ffordd y gallai’r effeithiau godi.